۔،۔(30جولائی 2023) خانقاہ نیک آباد مراڑیاں شریف گجرات میں عظیم الشان شہادت کربلا کانفرنس۔،۔
شان پاکستان جرمنی فرینکفرٹ /گجرات / لاہور/ اسلام آباد: (30جولائی 2023) خانقاہ نیک آباد مراڑیاں شریف گجرات میں عظیم الشان شہادت کربلا کانفرنس وعرس مبارک قطب الاولیاء حضرت خواجہ پیر محمد اسلم قادری رحمۃ اللہ علیہ کی تقریبات اختتام پذیر ہوگئی ہیں۔ ملک بھر سے ہزاروں حضرات و خواتین نے شرکت کی۔ تقریبات کی صدارت پیشوائے اہلسنت حضرت پیر محمد افضل قادری نے کی۔ جبکہ ممتاز علماء اسلام ومشائخ عظام نے خطابات کئے اور گل گلستان رسول، نواسہ رسول، فرزند بتول، امام عالی مقام، سید الشہدا حضرت امام حسین اور دیگر شہداء کربلا رضوان اللہ علیہم اجمعین کے فضائل مناقب اور شہادتوں کا تذکرہ کرتے ہوئے انہیں زبردست خراج عقیدت پیش کیا۔ پیشوائے اہلسنت حضرت پیر محمد افضل قادری، پیر عثمان افضل قادری، و دیگر مقررین نے کہا کہ امام عالی مقام حضرت امام حسن اور امام عالی مقام حضرت امام حسین جنتی نوجوانوں کے سردار ہیں۔ دونوں شہزادے خوبصورت تھے کیونکہ رسول خدا ﷺ کے مشابہ تھے۔ اور خوب سیرت تھے کہ انکی تربیت سیدہ طیبہ حضرت فاطمۃ الزہرا رضی اللہ عنہا اور باب مدینۃ العلم مولائے کائنات حضرت علی رضی اللہ عنہ اور بالخصوص سید الانبیاءﷺ نے فرمائی تھی۔ امام عالی مقام سیدنا امام حسین رضی اللہ عنہ نے قرآن وسنت کی بالا دستی کیلئے کربلا کے مقام پر عظیم تاریخ رقم فرمائی۔ واقعہ کربلا صبح قیامت تک مشعل نور اور صبر واستقامت کی عظیم مثال ہے۔ محبت امام پاک کا تقاضہ ہے کہ مسلمان اپنا کردار اچھا کریں اور تقوی وطہارت اختیار کریں۔ مقررین نے کہا کہ مملکت خدا داد پاکستان کے استحکام وسلامتی کیلئے ضروری ہے کہ وطن عزیز پاکستان میں رحمۃ للعالمین ﷺ کا نظام مصطفی نافذ کیا جائے۔ تحفظ ناموس رسالتﷺ، حرمت آل واصحاب اور تحفظ پاکستان کیلئے قوم متحد ہے۔ اس موقع پر صاحب عرس قطب الاولیاء حضرت خواجہ پیر محمد اسلم قادری کی دینی وروحانی خدمات کو خراج تحسین پیش کیا گیا اور کہا گیا کہ ان کی زندگی زہدوعبادت، اطاعت خدا، عشق مصطفی، محبت آل واصحاب ومحبت غوث اعظم اور بے مثال دینی وروحانی خدمات سے عبارت ہے۔ آپکی قائم کردہ درسگاہ جامعہ قادریہ عالمیہ کے ہزاروں فارغ التحصیل علماء وعالمات دنیا بھر میں شاندار دینی خدمات انجام دے رہے ہیں اور دنیا بھر میں سینکڑوں شاخیں قائم ہوچکی ہیں۔ جبکہ انکے ہاتھوں ان گنت کرامات ظاہر ہوئیں اور ہزاروں لاکھوں لوگ انکے علمی وروحانی فیض سے مستفید ہوئے۔
شہادت کربلا کانفرنس وعرس قطب الاولیاء سے پیشوائے اہلسنت پیر محمد افضل قادری اور پیر عثمان افضل قادری خطاب کر رہے ہیں، ہزاروں افراد شریک ہیں۔
