۔،۔ قطر اور اس کے پڑوسی ممالک میں تناوُ طوالت اختیار کر چکا ہے۔،۔

شان پاکستان دوحہ قطر۔ بین الاقوامی میڈیا کے مطابق امریکی وزیر خارجہ مائیک پومپیو نے امریکا کی اتحادی خلیجی ریاستوں میں تنازعات ختم کرنے پر زور دیتے ہوئے کہا کہ مشترکہ چیلنج سے نمٹنے کے لئے آپس کے مسائل کو دور کرنا ہو گا۔مائیک پومپیو خلیج اور عرب میں امریکی اتحادی ریاستوں کے درمیان اختلاف دور کرنے کے مشن پر ابوظہبی سے دوحا پہنچے۔ امریکی وزیر خارجہ کےان دوروں کا ایک مقصد علاقائی سطح پر ایران کے خلاف حمایت حاصل کرنا بھی ہے۔قطری وزیر خارجہ محمد بن عبدالرحمان سے ملاقات کے بعد مشترکہ نیوز کانفرنس میں مائیک پومپیو کا کہنا تھا کہ قطر اور اس کے پڑوسی ممالک میں تناؤ طوالت اختیار کرچکا ہے اور خلیجی ریاستوں کی جانب سے دوحا کا بائیکاٹ اب 19 ویں ماہ میں داخل ہو رہا ہے، اس سفارتی تنازع سے خود سعودی عرب، متحدہ عرب امارات، بحرین ، مصر اور قطر اپنے دشمنوں کو فائدہ پہنچارہے ہیں۔پومپیو نے کہا کہ ہم اس وقت زیادہ طاقت ور ہوں گے جب مل کر کام کریں گے اور ہمارے تنازعات کم سے کم ہوں گے، جب ہمارے چیلنجز مشترکہ ہیں تو آپس کی لڑائی یا تناؤ ہدف کے حصول میں کبھی مددگارثابت نہیں ہوں گے۔امریکی وزیر خارجہ کا یہ بھی کہنا تھا کہ سعودی فرماں رواں شاہ سلمان سے ملاقات میں وہ مقتول صحافی خاشقجی کے قاتلوں کو ان کے کیے گئے جرم کی سزا دینے کو یقینی بنانے پر زور دیں گے۔

ایڈیٹرچیف نذر حسین کی زیر نگرانی آپ کی خدمت میں پیش ہے