۔،۔نیک آباد شریف میں نماز عید الفطر عقیدت واحترام کیساتھ ادا کی گئی۔،۔
گجرات/ لاہور/ اسلام آباد: (پریس ریلیز) نیک آباد شریف میں عید الفطر کا عظیم الشان اجتماع۔ ہزاروں غلامان رسول نے نماز عید الفطر عقیدت واحترام کیساتھ ادا کی۔ ملک وملت کی خیریت وسلامتی کیلئے دعائیں کی گئیں۔ پیشوائے اہلسنت پیر محمد افضل قادری نے امت مسلمہ کو عید مبارک کا پیغام دیا اور اپنے خطاب میں کہا کہ عیدالفطر اللہ رب العالمین کے فضل وکرم اور عبادات رمضان کے انعامات حاصل کرنے کادن ہے۔ یہ دن آتا ہے تو اللہ تعالیٰ فرشتوں کے سامنے اپنے بندوں پر فخر کرتے ہیں اور فرماتے ہیں کہ اے میرے فرشتو! اس شخص کی کیا جزاء ہے جو اپنا کام مکمل کر دے؟ فرشتے عرض کرتے ہیں: اسکی جزاء یہ ہے کہ اس کو پورا اجرو ثواب عطا کیا جائے۔ چنانچہ اللہ تعالیٰ فرماتے ہیں: اے فرشتو! میرے بندوں اور بندیوں نے اپنا فرض ادا کیا پھر وہ نماز عید کی صورت میں دعاء کیلئے نکل آئے ہیں، مجھے میری عزت و جلال، میرے کرم اور میرے بلند مرتبہ کی قسم! میں ان کی دعاؤں کو ضرو ر قبول کروں گا۔ پھر رب ذولجلال فرماتے ہیں: بندو! تم گھروں کو لوٹ جاؤ میں نے تمہیں بخش دیا اورتمہارے گناہوں کو نیکیوں میں بد ل دیا۔ پھر وہ بندے عید کی نماز سے لوٹتے ہیں حالانکہ اُن کے گناہ معاف ہوچکے ہوتے ہیں۔ انہوں نے کہا کہ امت مسلمہ دین کی سربلندی کیلئے بھرپور کردار ادا کرے۔ جبکہ پاکستان کے حکمران وطن عزیز پاکستان میں نظام مصطفی ﷺ نافذ کریں۔ اور علمائے کرام ومشائخ عظام امت کی تعلیم تربیت اور اصلاح کیلئے اپنی جدو جہد موثر اور تیز تر کر دیں۔ اس موقع پر مفتی اسلام پیر عثمان افضل قادری نے خطبہ عید ارشاد فرمایا۔ نماز عید کے بعد امت مسلمہ وطن عزیز پاکستان، افواج پاکستان اور خصوصا حاضرین کیلئے دعائیں کی گئیں۔ بعد ازاں پیشوائے اہلسنت پیر محمد افضل قادری، پیر عثمان افضل قادری، پیر صدیق افضل قادری، پیر حسنین افضل قادری نے عقیدتمندوں سے فردا فردا عید ملی۔