۔،۔ سویڈن میں اُردو زبان کے نصاب میں عارف محمود کسانہ کی کتاب٭وطنِ ثانی٭شامل۔ نذر حسین۔،۔
٭سویڈن میں مقیم تمام طلبہ کو اپنی مادری زبان سیکھنے اور پڑھنے کا حق حاصل ہے، جس کا انتظام سرکاری طور پراسکول اور کالج کی سطح پر کیا جاتا ہے جبکہ اس مقصد کے لئے سرکاری طور پر اساتذہ کی تقرری بھی کی جاتی ہے٭
شان پاکستان جرمنی فرینکفرٹ/سویڈن/سٹاک ہوم۔ سویڈن میں مقیم ڈاکٹر عارف محمود کسانہ جو کسی تعارف کے محتاج نہیں کی کتاب ٭وطنِ ثانی٭کو سویڈن میں اُردو زبان کے نصاب میں شامل کر لیا گیا ہے، واضح رہے سویڈن میں مقیم تمام طلبہ کو اپنی مادری زبان سیکھنے اور پڑھنے کا حق حاصل ہے، جس کا انتظام سرکاری طور پراسکول اور کالج کی سطح پر کیا جاتا ہے جبکہ اس مقصد کے لئے سرکاری طور پر اساتذہ کی تقرری بھی کی جاتی ہے، سویڈن میں پاکستانی نثراد طلباء و طالبات سرکاری تعلیمی اداروں میں شوق سے اُردو پڑھتے ہیں جس کے باعث سویڈن کے بچوں کی اردو بانی یورپ کے دیگر ممالک میں مقیم پاکستانی بچوں کے مقابلہ میں بہتر ہے۔ حالیہ طور پر سویڈن کے دارالحکومت سٹاک ہوم کی نواحی بلدیہ بوتشرکا کمیون نے کالج سطح پر اردو زبان کے نصاب میں عارف محمود کسانہ کی سویڈن کے بارے میں تحریر کردہ معروف کتاب “وطنِ ثانی” کو شامل کرنے کا فیصلہ کیا ہے۔ توقع ہے کہ دیگر کمیونز بھی اس اقدام کی پیروی کریں گی۔ کتاب وطنِ ثانی کو نصاب میں شامل کرنے کی ایک اہم وجہ اس کی سادہ، رواں اور طلبہ کے لیے قابلِ فہم زبان ہے۔ اس کتاب میں سویڈن کی تاریخ، جمہوریت، نظامِ حکومت، قوانین، ثقافت، رسوم و رواج، اہم شخصیات، سویڈن میں اسلام اور اردو زبان کی تاریخ کے ساتھ ساتھ پاکستانیوں کی سرگرمیوں پر بھی تفصیل سے روشنی ڈالی گئی ہے۔ مزید برآں، اس میں دنیا بھر سے اردو ادب کی ممتاز شخصیات کی نگارشات شامل ہیں جن میں ڈاکٹر عبدالقدیر خان، ڈاکٹر محمد امجد ثاقب، پروفیسر ڈاکٹر نبیلہ رحمن، پروفیسر ڈاکٹر ہینز ویرنر ویسلر، پروفیسر ڈاکٹر محمد اکرام الدین، سفیرِ پاکستان ڈاکٹر ظہور احمد، نصر ملک، جمیل احسن، این خیرلوت اینڈرسن، ڈاکٹر ندیم حسین، رمضان رفیق اور شہزاد انصاری کے مضامین نمایاں ہیں۔وطنِ ثانی کو نیشنل بک فاؤنڈیشن اسلام آباد نے شائع کیا ہے، جو عارف کسانہ کی بچوں کے لیے لکھی گئی دو مقبول کتابیں سبق آموز کہانیاں (حصہ اول و دوم) بھی شائع کر چکی ہے۔ یہ دونوں کتابیں پاکستان، سویڈن، فن لینڈ، بھارت اور دیگر ممالک کے متعدد تعلیمی اداروں میں نصابی یا تربیتی مواد کے طور پر پڑھائی جا رہی ہیں، جب کہ ان کا کئی زبانوں میں ترجمہ بھی ہو چکا ہے۔علاوہ ازیں، آزاد حکومت ریاست جموں و کشمیر اور پاکستان آرمی نے اپنے تمام سرکاری کتب خانوں میں وطنِ ثانی کی شمولیت کے لیے باضابطہ نوٹیفکیشن بھی جاری کیا ہے۔
Dr.Arif Mahmood Kasana
