۔،۔ علامہ اقبال کی یادگار کی بحالی۔ارتضی یوسف کی قابل تحسین کاوش اور شہر ہائیڈل برگ کی ذمہ دارانہ پیش رفت۔ نذر حسین۔،۔
٭جرمن پاکستانی سوسائٹی کارلسروئے کے بانی محمد رفیق کی جانب سے ارتضی یوسف اور ہائیڈل برگ کی انتظامیہ کو خراج تحسین٭
شان پاکستان جرمنی فرینکفرٹ/کارلسروئے/ہائیڈل برگ۔جرمنی کے خوبصورت اور تاریخی شہر ہائیڈل برگ میں دریائے نیکر کے دلکش کنارے پر نصب ایک یادگاری پتھر نے صرف ادبی و تاریخی اہمیت کا حامل ہے بلکہ جرمنی اور پاکستان کے مابین تہذیبی ہم آہنگی، ثقافتی روابط اور باہم دوستی کی ایک خوبصورت علامت بھی ہے، اس یادگاری پتھر پر مشرق کے عظیم شاعر،مفکر اور عالمی شہرت یافتہ فلسفی علامہ ڈاکٹر محمد اقبال کی ایک اہم نظم کندہ ہے، جو ان کے فکری و ادبی مقام اور جرمنی کے ساتھ ان کے علمی و تہذیبی تعلق کی یاد دلاتی ہے۔ تاہم وقت گزرنے کے ساتھ اس یادگار پر سیاہی کے دھبے اور آلودگی کے آثار نمایاں ہونے لگے تھے، جس کے باعث اس کی ظاہری خوبصورتی اور تاریخی وقار متاثر ہو رہا تھا۔اس صورتِ حال کا نوٹس لیتے ہوئے جناب ارتضیٰ یوسف نے غیر معمولی ذاتی دلچسپی، احساسِ ذمہ داری اور اپنے ثقافتی ورثے سے وابستگی کا عملی ثبوت دیا۔ انہوں نے اس اہم مسئلے کی جانب انتظامیۂ شہر ہائیڈلبرگ کی توجہ مبذول کرائی اور اپنی مخلصانہ کوششوں کے ذریعے یادگار کی پیشہ ورانہ انداز میں صفائی اور اس کی اصل خوبصورتی کی بحالی کے لیے مؤثر کردار ادا کیا۔یہ امر نہایت خوش آئند اور قابلِ اطمینان ہے کہ شہر ہائیڈلبرگ کی انتظامیہ نے اس درخواست کو نہایت مثبت انداز میں قبول کیا اور کھلے دل، ذمہ داری کے احساس اور بھرپور تعاون کا مظاہرہ کیا۔ چنانچہ متعلقہ حکام کی جانب سے یادگاری پتھر کی باقاعدہ اور پیشہ ورانہ طریقے سے صفائی کر دی گئی، جس کے نتیجے میں یہ یادگار دوبارہ اپنی اصل خوبصورتی اور وقار کے ساتھ نمایاں ہو گئی ہے۔بلاشبہ یہ پیش رفت محض ایک یادگاری پتھر کی صفائی کا معاملہ نہیں بلکہ ہمارے مشترکہ ثقافتی ورثے، قومی شناخت اور علامہ ڈاکٹر محمد اقبال کے عظیم فکری و ادبی سرمایہ سے وابستگی اور اس کے احترام کا ایک قابلِ تحسین مظہر ہے۔ ایسی یادگاریں ہمیں نہ صرف اپنی تہذیبی اور ادبی تاریخ سے جوڑے رکھتی ہیں بلکہ مختلف قوموں اور معاشروں کے درمیان فکری و ثقافتی روابط کو بھی فروغ دیتی ہیں۔اس مثبت اقدام سے یہ حقیقت بھی اجاگر ہوتی ہے کہ بین الثقافتی ہم آہنگی، باہمی احترام اور دوستی کے رشتے محض الفاظ اور رسمی بیانات سے مضبوط نہیں ہوتے بلکہ عملی اقدامات، مشترکہ احساسِ ذمہ داری اور ایک دوسرے کے ثقافتی ورثے کے احترام سے پروان چڑھتے ہیں۔جرمن-پاکستانی سوسائٹی کارلسروہے (Deutsch-Pakistanische Gesellschaft Karlsruhe e.V.) کی جانب سے ہم جناب ارتضیٰ یوسف کو ان کی مثالی کاوش، ذاتی دلچسپی اور مخلصانہ جدوجہد پر دلی مبارک باد پیش کرتے ہیں اور انہیں خصوصی خراجِ تحسین پیش کرتے ہیں۔ ان کا یہ اقدام اس بات کی روشن مثال ہے کہ ایک باشعور اور ذمہ دار شہری اپنی انفرادی کوششوں سے بھی مثبت اور دیرپا تبدیلی کا ذریعہ بن سکتا ہے۔اسی طرح ہم شہر ہائیڈلبرگ کی انتظامیہ اور متعلقہ حکام کے بھی تہِ دل سے شکر گزار ہیں، جنہوں نے اس معاملے کو سنجیدگی سے لیا، درخواست کا مثبت جواب دیا اور بروقت عملی اقدام کے ذریعے اپنی ذمہ داری اور ثقافتی ورثے کے احترام کا قابلِ قدر ثبوت پیش کیا۔ ان کا یہ تعاون یقیناً ہمارے لیے باعثِ مسرت اور قابلِ ستائش ہے۔ہم امید کرتے ہیں کہ یہ خوبصورت مثال مستقبل میں بھی جرمنی اور پاکستان کے درمیان ثقافتی روابط، ادبی تعلقات، باہمی احترام اور دوستی کے رشتوں کو مزید مضبوط بنانے کا ذریعہ بنے گی۔
Before After
Before After
Ertiza Yusuf, Muhammad Rafique
